پاکستان اور چین سی پیک کے تحت اقتصادی تعاون کو مستحکم کرنے کے لئے پُر عزم ہیں،چینی سفیر برائے پاکستان۔

پاکستان میں متعین چینی سفیر یاؤ جِنگ نے ایس ڈی پی آئی کے زیرِ اہتمام ایک ویبنار میں سی پیک کے تحت پاکستان اور چین کے مابین باہمی تعاون اور اقتصادی شراکت داری کی تعریف کرنے کے ساتھ ساتھ گوادر پورٹ کی ترقی سے متعلق امور پر گفتگو کی ہے۔ انہوں نے مزید کہا ہے کہ کورونا وائرس کے وبائی مرض کے سبب پیدا آزمائشوں کے باوجود گوادر منصوبے پر عمل درآمد میں کامیابیاں حاصل کی گئی ہیں۔ مزید برآں سی پیک اتھارٹی کے چیئرمین لیفٹیننٹ جنرل (ر) عاصم باجوہ نے گوادر بندرگاہ کی پوری استعداد کو بروئے کار لانے کے لئےتنظیم و انصرام کےمعاملات پراطمینان کا اظہار کیا ہے۔ انہوں نے وضاحت کرتے ہوئے کہا کہ گوادر ایسٹ بے ایکسپریس وے اور گوادر ہوائی اڈہ زیر تعمیر ہیں اور ان کے سبب گوادر بہت جلد میگا سٹی بن کر باقی پاکستان اور دنیا سے منسلک ہو جائے گا۔ انہوں نے مزید کہا کہ گوادر پراجیکٹ کا دائرہ کار گہری سمندری بندرگاہ کو متحرک کرنے کے اپنے بنیادی مقصد سے کہیں زیادہ وسیع ہے اور اس کی مدد سے گوادر اکنامک ڈسٹرکٹ کی ترقی اور جنوبی بلوچستان میں سماجی و اقتصادی ترقی کو ممکن بنانا ہے۔