چین پاکستان کی معیشت کے استحکام کے لئے سی پیک کے ذریعے سے مدد فراہم کررہا ہے، چینی قونصل جنرل۔

چین کے قائم مقام قونصل جنرل پینگ ژینگو نے پاکستان کے روزنامہ دی نیشن کو دیے گئے ایک انٹرویو کے دوران کہا ہےکہ چین سی پیک اور اس سے جڑے منصوبوں کے ذریعے سے پاکستان کی معیشت کے استحکام کے لئے مدد کا خواہاں ہے۔ انہوں نے سفارتی تعلقات کے قیام کے بعد سے ہی دونوں ممالک کے مابین سدا بہار تعلقات کو نہایت اہمیت کا حامل قرار دیا۔ انہوں نے بی آر آئی کے فلیگ شپ منصوبہ سی پیک کو ملکی معیشت کے لئے ریڑھ کی ہڈی کی اہمیت کا حامل قرار دیتے ہوئے مزید کہا کہ اگلے مرحلے کے دائرہ کار میں تعلیم ، ماحولیات،زراعت اور خصوصی اقتصادی زونز میں تعاون کے شعبوں سے جڑےترقیاتی منصوبے شامل ہوں گے۔ انہوں نے کہا کہ سی پیک کو متنازعہ بنانے کے تمام مذہوم عزائم ناکام ہونگے کیونکہ چین عالمی برادری کے مشترکہ مستقبل کی تعمیر کا خواہاں ہے۔