سی پیک منصوبے کے سبب پاکستان میں تعمیروترقی کے ایک نئے دورکا آغاز ہوا ہے۔

اسلام آباد پالیسی ریسرچ انسٹیٹیوٹ کی ایک ریسرچر عروج صغیر لکھتی ہیں کہ پاکستان کے پاس سی پیک کے ذریعے جنوبی، مشرقی اور وسطی ایشیا کی معیشتوں سے جڑنے کا موقع ہے۔ انہوں نے مزید کہا کہ پاکستان میں افرادی قوت کو چینی کاروباری اداروں کے ساتھ مشترکہ منصوبوں کے ذریعے تربیت دی جائے گی۔ پاکستانی تاجروں کو مقامی منڈیوں میں چینی مصنوعات کی بدولت بین الاقوامی مارکیٹ سے روشناس کرایا جائے گا۔ چین نے پاکستان میں سی پیک منصوبوں پر 25 ارب ڈالر کی سرمایہ کاری کی ہے۔ اپنے مضمون میں عروج صغیر مزید لکھتی ہیں کہ پاکستان سے چین کو مجموعی طور پر 251.30 ملین ڈالر کی برآمدات ہوئیں، جو پچھلے سال کے مقابلے میں 8 فیصد زیادہ ہے۔ چین نے پاکستان کو 2 ارب ڈالر کے سیف ڈپازٹس کی توسیع کردی ہے۔ سی پیک نے مقامی لوگوں کے لیے روزگار کے مواقعوں میں اضافہ کیا ہے۔ وہ یہ نتیجہ اخذ کرتی ہیں کہ اب تک 22 منصوبوں میں 75,000 ملازمتیں پیدا ہو چکی ہیں جبکہ سی پیک کے آئندہ منصوبوں کے لیے 1.40 بلین ڈالر کی پیشگی ادائیگی بھی زیر غور ہے۔