وفاقی وزارتِ تعلیم اور چین کے درمیان تعلیمی تعلقات کو مزید مستحکم کرنے کے حوالے سے مفاہمت کی یاداشت پر دستخط۔

وفاقی وزیر برائے تعلیم و پیشہ ورانہ تربیت ڈاکٹر خالد مقبول صدیقی نے کہا ہے کہ چین اور پاکستان کی دوستی مثالی ہے جو اس خطے کے لیے استحکام اور خوشحالی کی علامت ہے۔ پاکستان ایک فیصلہ کن مرحلے پر کھڑا ہے، ہمارے نوجوان عالمی سطح پر بھی ہنرمند افرادی قوت بن سکتے ہیں۔ تفصیلات کے مطابق پاکستان کی وزارتِ وفاقی تعلیم و پیشہ ورانہ تربیت (ایف ای اینڈ پی ٹی) اور چین کے تانگ انٹرنیشنل ایجوکیشن گروپ کے درمیان کراچی کے 20 ووکیشنل اداروں کو جدید بنانے کے لیے ایک مفاہمت کی یادداشت (ایم او یو) پر دستخط ہو گئے۔ اس شراکت داری کا مقصد انفراسٹرکچر کو بہتر بنانا، آئی ٹی اور سمارٹ لیبز قائم کرنا اور پاکستان بھر میں مراکز مہارت (سینٹرز آف ایکسیلینس) قائم کرنا ہے یہ معاہدہ نیشنل ووکیشنل اینڈ ٹیکنیکل ٹریننگ کمیشن (این اے وی ٹی ٹی سی)کے ڈائریکٹر جنرل ایڈمن و فنانس شفیق حسین کھوکھر اور تانگ انٹرنیشنل کی پاکستانی ذیلی کمپنی کے چیئرمین و سی ای او سونگ جیان ینگ کے درمیان طے پایا۔