پاکستان میں معاشی سرگرمیوں میں تیزی لانے کے لئے سی پیک دوسرا مرحلہ نہایت اہمیت کا حامل،چیئرمین سی پیک اتھارٹی۔

چیئرمین سی پیک اتھارٹی لیفٹیننٹ جنرل (ر) عاصم سلیم باجوہ نے آگاہ کیا ہے کہ وزیر اعظم عمران خان نے سی پیک منصوبوں کی تیز رفتار تکمیل کو یقینی بنانے کی ہدایت کی ہے۔ چیئرمین نے مزیدکہا ہےکہ سی پیک پر سیاسی اور عسکری قیادت میں مکمل اتفاق رائے موجودہے۔ جبکہ سی پیک اتھارٹی نے مقامی اور غیر ملکی سرمایہ کاروں کو ون ونڈو آپریشن کے ذریعہ سہولیات فراہم کرکے سی پیک پر عملدرآمد کو اپنی اہم ترجیحات کا حصہ بنایاہے۔ پاکستان کی اقتصادی ترقی کو فروغ دینے کے لئے کووڈ-19 سے قطع نظر سی پیک کے دوسرے مرحلے کے تحت سی پیک خصوصی اقتصادی علاقوں پر کام جاری ہے۔ چیئرمین نے مزید بتایاکہ سی پیک سے منسلک منصوبوں کے بارے میں چین اور پاکستان کے درمیان مکمل دوطرفہ ہم آہنگی قائم ہے۔ مزید برآں سی پیک کے تحت کوہالہ اور آزاد پتن بجلی منصوبے صاف توانائی کی پیداوار کو یقینی بنائیں گے جس سے پاکستان کو بجلی کی قلت پر قابو پانے میں مدد ملے گی۔