پاکستان کو غربت کے خاتمے کے چینی ماڈل سے سبق سیکھنے کی ضرورت ہے،حسن ایچ زیدی۔

حسن ایچ زیدی لکھتے ہیں کہ پاکستان میں غربت ایک بہت بڑا معاشی و اقتصادی مسئلہ ہے اور اسلام آباد کو چینی ماڈل سے سبق سیکھنے کی ضرورت ہے۔ وہ پاکستان کے وزیر اعظم عمران خان کا حوالہ دیتے ہوئے لکھتےہیں کہ وہ ملک سے غربت کے خاتمے کے لئے چینی قیادت کی اکثر تعریف کرتے ہیں۔ وزیراعظم عمران خان اس ضمن میں کہتے ہیں کہ چین کی آبادی 1.4 ارب ہے اور اس بڑی آبادی کو غربت سے نکالنا ایک تاریخی کارنامہ ہے۔ 1978 میں جب معاشی اصلاحات کا آغاز ہوا چین بنیادی طور پر ایک زرعی معاشرہ تھا اور دیہی غربت 97 فیصد سے زیادہ تھی۔ اس وقت سے اب تک 770 ملین دیہی افراد جبکہ گذشتہ آٹھ سالوں میں تقریبا 99 ملین افراد کو غربت سے نکال دیا گیا ہےنیز صدر شی جن پنگ کی صدارت میں یہ کامیابی حاصل کی گئی ہے۔ انہوں نے مزید کہا ہے کہ غربت کے خاتمے کے لئے مستقل معاشی نمو کی ضرورت ہے جیسا کہ چین کی معیشت میں دیکھا جاسکتا ہے۔ سرمایہ دار ہو یا سوشلسٹ آبادی کو غربت سے نکالنے کے لئے معیشت کو طویل عرصے کے لئے مضبوط نمو کی راہ پر گامزن کرنا ہوتا ہے۔