چیئرمین سینیٹ چین کی سی پی پی سی سی کی نیشنل کمیٹی کے چیئرمین سے آج اہم ملاقات کریں گے۔باہمی دلچسپی کے امور پر گفت و شنید متوقع۔

چیئرمین سینیٹ پاکستان سینیٹر محمد صادق سنجرانی اورچائینیز پیپلز پولیٹیکل کنسلٹیٹیو کانفرنس(سی پی پی سی سی) کی قومی کمیٹی کے چیئرمین مسٹر وانگ یانگ آج ایک اہم ملاقات کریں گے۔ تفصیلات کے مطابق دونوں رہنما پاک چین دوطرفہ تعلقات ،کووڈ-19 کے بعد کے دور میں پارلیمانی تعاون اورسی پیک تعاون کے ساتھ ساتھ قانون سازی کے تبادلے پر گفت و شنید کریں گے۔ اس ملاقات میں چیئرمین سینیٹ کے ہمراہ سینیٹر سجاد حسین طوری ، سینیٹر دلاور خان ، سینیٹر مرزا محمد آفریدی ، سینیٹر محمد علی خان سیف ، سینیٹر مشاہد حسین سید ، سینیٹر نصیب اللہ بازئی اور سینئر بیوروکریٹس بھی موجود ہوں گے۔