چین نے چینی کاروباری اداروں کے تحفظات دور کرنے میں پاکستان کی کاوشوں کو قابلِ تعریف قرار دے دیا۔

چینی وزارت خارجہ کے ترجمان ژاؤ لیجیان نے پاکستان میں مقیم چینی کمپنیوں کے اجلاس کی میزبانی اور انہیں پاکستان میں سرمایہ کاری کے مزید مواقعوں سے آگاہ کرنے میں پاکستان کی کاوشوں کو سراہا ہے۔انہوں نے مزید کہا کہ سی پیک تیز رفتاراور معیاری ترقی کے مرحلے میں داخل ہو گیا ہے۔ انہوں نے امید ظاہر کی کہ پاکستان مستقبل میں بھی چینی کمپنیوں کے لیے سازگار ماحول فراہم کرے گا۔واضح رہے کہ اس اجلاس کی مشترکہ صدارت وزیر اعظم کے معاون خصوصی برائے سی پیک امور خالد منصور اور وفاقی وزیر برائے منصوبہ بندی،ترقی اور خصوصی اقدامات اسد عمر نے کی تھی۔