چین کے وزیراعظم لی چیانگ کے اعزاز میں وزیراعظم ہائوس میں استقبالیہ تقریب کا انعقاد

عوامی جمہوریہ چین کے وزیراعظم لی چیانگ کے اعزاز میں وزیراعظم ہائوس میں باضابطہ استقبالیہ تقریب کا انعقاد کیا گیا اور انہیں گارڈ آف آنر پیش کیا گیا۔ عوامی جمہوریہ چین کے وزیراعظم لی چیانگ کے اعزاز میں وزیراعظم ہائوس میں باضابطہ استقبالیہ تقریب کا انعقاد کیا گیا۔ وزیراعظم ہائوس پہنچنے پر وزیراعظم محمد شہباز شریف نے ان کا پرتپاک استقبال کیا۔ اس موقع پر دونوں وزراء اعظم نے ایک دوسرے کیلئے خیرسگالی کے جذبات کا اظہار کیا۔ وزیراعظم شہباز شریف چینی وزیراعظم کو اپنے ہمراہ سلامی کے چبوترے پر لے کر گئے جہاں دونوں ممالک کے قومی ترانوں کی دھنیں بجائی گئیں۔ چینی وزیراعظم نے گارڈ آف آنر کا معائنہ کیا۔ تینوں مسلح افواج کے چاق و چوبند دستے نے چین کے وزیراعظم کو سلامی دی۔ چینی وزیراعظم کا اس موقع پر وفاقی کابینہ کے اراکین اور عملہ سے تعارف کرایا گیا جبکہ چین کے وفد کا پاکستانی وزیراعظم کے ساتھ تعارف کرایا گیا۔ چین کے وزیراعظم نے وزیراعظم شہباز شریف کے ساتھ مل کر وزیراعظم ہائوس کے احاطہ میں یادگار کے طور پر پودا بھی لگایا۔