مضبوط اور خوشحال پاکستان چین کی اصل طاقت کا سر چشمہ ہے۔۔۔چینی سفیر یاؤ جِنگ۔

چینی سفیر برائے پاکستان یاؤ جِنگ نے سپیکر قومی اسمبلی اسد قیصر سے عصری منظرنامے میں دوطرفہ تعلقات پر تبادلہ خیال کرنے کے لئے خصوصی ملاقات کی ہے۔ تفصیلات کے مطابق اس ملاقات کے دوران قومی اسمبلی کےسپیکر نے کہا کہ پاک چین تعلقات مشترکہ جغرافیائی ،سیاسی ، معاشی ، تاریخی اور تزویراتی مفادات پر مبنی ہیں۔ انہوں نے اس بات پر زور دیا کہ دونوں ممالک تعمیر وترقی کے سفر میں شراکت دار ہیں۔ سپیکر نے دونوں ممالک کے پارلیمانی گروپس اور کاروباری برادریوں کے مابین مراسم اور تعاون کو فروغ دینے کی تجویز پیش کی۔ چینی سفیر یاؤ جِنگ نے کہا کہ ایک مضبوط اور خوشحال پاکستان چین کی اصل طاقت کا سر چشمہ ہے اورسی پیک کے تحت دوطرفہ تعاون سے پاکستان اور پورے خطے کی سماجی و اقتصادی ترقی کو فروغ ملے گا۔نیز چینی سفیر نے پاکستان میں معاشرتی بہبود کے فروغ کے لئے مقامی ترقیاتی شراکت داروں کو شامل کرنے کی یقین دہانی بھی کرائی۔