وزیر اعظم عمران خان بیجنگ سرمائی اولمپکس کی افتتاحی تقریب میں شرکت کے لیے آج چین روانہ ہوں گے۔

دفتر خارجہ کے بیان کے مطابق وزیراعظم عمران خان چین کے چوتھے سرکاری دورے پر آج چین روانہ ہوں گے۔ ان کے ساتھ ایک اعلیٰ سطحی وفد شامل ہوگا جس میں کابینہ کے ارکان اور اعلیٰ سرکاری افسران شامل ہوں گے۔ وزیر اعظم عمران خان بیجنگ سرمائی اولمپکس کی افتتاحی تقریب میں شرکت کریں گے اور چینی صدر شی جن پنگ اور وزیر اعظم لی کی چیانگ سے دو طرفہ ملاقاتیں کریں گے۔ دونوں ملکوں کی قیادت تمام پہلوؤں کا جائزہ لے گی جس میں سی پیک سمیت مضبوط تجارتی اور اقتصادی تعاون پر خصوصی توجہ دی جائے گی۔اس دورے کے دوران متعدد مفاہمت کی یادداشتوں اور معاہدوں پر دستخط کیے جائیں گے۔ وزیراعظم چین کے ممتاز کاروباری رہنماؤں اور چین کے سرکردہ تھنک ٹینکس، اکیڈمی اور میڈیا کے نمائندوں سے بھی ملاقات کریں گے۔ اس کے علاوہ وزیراعظم سائیڈ لائنز پر دیگر دو طرفہ گفت و شنید بھی کریں گے۔ دونوں فریق اہم علاقائی اور بین الاقوامی امور پر بھی وسیع پیمانے پر تبادلہ خیال کریں گے۔