پاکستان ،چین کا ٹیکسٹا ئل سمیت کئی شعبوں میں جوائنٹ وینچرز پر اتفاق۔

وزیر تجارت ڈاکٹر گوہر اعجاز نے اعلیٰ سطحی وفد کے ہمراہ چین کا انتہائی کامیاب دورہ مکمل کر لیا ۔ پریس ریلیز کے مطابق دورہ چین کے تین اہم شہروں پر محیط تھا۔وفد نے چائنا پاکستان ٹیکسٹائل سمٹ میں شرکت کی، یہ ایک اہم تقریب تھی جس نے دونوں ممالک کے صنعت کاروں کو اکٹھا کیا۔ ملاقات کا مقصد دوطرفہ تجارتی تعلقات کو مضبوط بنانا اور تعاون میں اضافے کے مواقع تلاش کرنا تھا۔ اس دورے کے دوران ایک اہم سنگ میل چائنہ چیمبرز آف کامرس اور آل پاکستان ٹیکسٹائل ملز ایسوسی ایشن (ایپٹما ) کے درمیان مفاہمت کی یادداشت پر دستخط تھا۔ یہ معاہدہ ٹیکسٹائل کے شعبے میں تعاون کو بڑھانے اور باہمی مفادات کو فروغ دینے کے عزم کی نشاندہی کرتا ہے۔ تاجروں پر مشتمل وفد نےچینی اپنے ہم منصبوں کے ساتھ نتیجہ خیز بزنس ٹو بزنس (بی 2بی ) ملاقاتیں کیں۔ دونوں ممالک کے درمیان اقتصادی تعلقات کو مضبوط بنانے کے حتمی مقصد کے ساتھ ٹیکسٹائل کی درآمدات اور برآمدات کو بڑھانے پر توجہ مرکوز کی گئی۔ تجارت کے مواقع تلاش کرتے ہوئے، مندوبین نے متعدد شعبوں میں ممکنہ مشترکہ منصوبوں پر بات چیت کی۔ یہ پاکستان اور چین کے درمیان کاروباری ترقی کے لیے باہمی تعاون اور مشترکہ وژن کی مثال ہے۔ مشترکہ کوششوں کی اہمیت کے پیش نظر مندوبین نے دونوں ممالک کے کاروباری افراد کے درمیان تعاون کی ضرورت پر زور دیا۔ بات چیت میں پاکستان کی صنعتوں میں ویلیو ایڈیشن کو بڑھانے کے لیے جدید چینی ٹیکنالوجی کا استعمال شامل تھا۔ اس دورے کا مرکزی نقطہ پاکستان کے خصوصی اقتصادی زونز (ایس ای زیڈز ) میں چینی ٹیکنالوجی کی منتقلی کو یقینی بنانا تھا۔ مندوبین نے اس بات پر تفصیلی بات چیت کی کہ یہ منتقلی کس طرح پاکستان میں جدت اور معاشی ترقی کو آگے بڑھا سکتی ہے