پاکستان اور چین کی دوستی بلاشبہ ہمالیہ سے بلند ہے، ڈاکٹر سردار محمد طاہر۔

انسٹیٹیوٹ آف پیس اینڈ ڈویلپمنٹ کے صدر ڈاکٹر سردار محمد طاہر تبسم پاکستان اور چین کے مابین 21 مئی 1951کو آغاز ہونے والے ستر سال کی لازوال اور بے مثال دوستی اور مضبوط سفارتی تعلقات کے بارے میں لکھتے ہیں کہ اقتصادی اور دفاعی تعاون کے ساتھ ساتھ دہشت گردی سے لڑنے میں چین نے ہمیشہ سے پاکستان کا ساتھ دیا ہے۔ وہ چین کو ایک قابل فخر دوست اور اہم پڑوسی سے تشبہہ دیتے ہوئے کہتے ہیں کہ پاک چین سفارتی دوستی ہمالیہ سے بلند اور سمندر سے بھی زیادہ گہری ہے۔ ڈاکٹر تبسم نے سی پیک اور بی آر آئی کو حقیقی دوستی کے عملی مظہر کے طور پر روشنی ڈالی ہے۔ اس ضمن میں وہ چیئرمین ماؤزے تنگ ، چوان لائی اور صدر شی جن پنگ کا خصوصی تذکرہ کرتے ہیں۔ ان کے خیال میں اس دوستی کو وسیع اور مضبوط رشتے میں پروان چڑھایا گیا ہے کہ ہر دور میں یہ رشتہ مضبوط سے مضبوط تر ہوتا جا رہاہے۔ سی پیک پراجیکٹ چینی صدر شی جن پنگ اور ان کی مستعد ٹیم کی دوراندیش حکمت عملی کا منہ بولتا ثبوت ہے جنہوں نے اربوں ڈالر کے بڑے منصوبے کو منظوری دے دی ہے اور اسے مکمل کرنے کے لئے پوری کوششیں جاری ہیں۔ چین نے ہمیشہ سے کشمیریوں کے حق خودارادیت کے لئے آواز بلند کی ہے جس سے ظاہر ہوتا ہے کہ یہ پاکستان کا حقیقی اور سچادوست ہے۔