چینی صنعتوں کی منتقلی پاکستان کی صنعتی ترقی کے لئے نا گزیر ہے، صدر آئی سی سی آئی۔

صدر اسلام آباد چیمبر آف کامرس اینڈ انڈسٹری (آئی سی سی آئی) سردار یاسر الیاس خان نے کہا ہے کہ چین سے صنعتوں کی منتقلی پاکستان میں صنعتی ترقی میں کلیدی کردار ادا کرے گی۔ ذرائع ابلاغ سے خطاب کرتے ہوئے انہوں نے واضح کیا کہ پاکستان میں مجموعی طور پر 150 ارب امریکی ڈالر کی برآمدات کی گنجائش موجود ہے۔ مزید برآں انہوں نے کہا کہ نئے مجوزہ صنعتی زونزکو چین پاکستان اقتصادی راہداری (سی پیک) کے خصوصی اقتصادی زون (ایس ای زیڈ) کے اسی طرز پر تیار کیا جائے گا۔ انہوں نے مزید کہا کہ حکومت ٹھوس کوششوں کے ذریعے زرعی صنعت کو بڑھا سکتی ہے جبکہ شفافیت اور احتساب حکومت کو اپنے معاشی ایجنڈے کے حصول میں مدد فراہم کرسکتی ہے۔