چینی وزیر خارجہ وانگ ژی کی جانب سے کابل تا پشاور زمینی ربط سازی کا عمل نہایت خوش آئیند قرار۔۔۔۔۔ سی پیک منصوبہ کو افغانستان تک وسیع کرنے کا عزم۔۔۔۔

چین،پاکستان اور افغانستان کے مابین سہ فریقی مذاکرات کے تیسرے دور کا آغاز7ستمبر سے اسلام آباد میں ہوا ہے۔جس میں چین کے قونصل جنرل و وزیر خارجہ وانگ ژی اور افغانستان کے وزیر خارجہ صلاح الدین ربابی نے خصوصی طور پر شرکت کی۔سہ فریقی مذاکرات میں تینوں ملکوں نے اقتصادی،دفاعی اورانسداد دہشتگردی کے شعبوں میں باہمی تعاون کے فروغ کے علاوہ خطے میں ربط سازی کے عمل کو مزید تیز کرنے پر اتفاق کیا۔اس دوران وانگ ژی نے خطے میں باہمی تعاون اور علاقائی رابطہ سازی کی اہمیت پر تبادلہ خیال کرتے ہوئے تینوں فریقوں کو سی پیک منصوبہ کو افغانستان تک رسائی دینے کے حوالے سے اپنی اپنی کاوشوں کو بروئے کار لانے پر زور دیا۔ اس کے علاوہ چینی وزیر خارجہ کا کابل سے پشاور تک زمینی رابطہ سازی کے عمل کو نہایت خوش آئیند قرار دیتے ہوئے کہنا تھا کہ خطے میں باہمی تعاون کے ذریعے ہی امن کے عمل کو کامیابی سے ہمکنار کیا جا سکتا ہے۔ اس کے علاوہ انہوں نے سماجی ترقی کے لئے باہمی تعاون کے معاہدے کا تذکرہ کرتے ہو ئے کہنا تھا کہ پاکستان اور افغانستان کو ثقافتی تبادلوں کے ذریعےعوام کے درمیان قربتوں کو بڑھانے کی ضرورت ہے۔