چین پاکستان اسٹریٹجک ڈائیلاگ خطے کیلئے نہایت اہمیت کے حامل۔

چین پاکستان اسٹریٹجک ڈائیلاگ خطے کیلئے اہمیت کے حامل ہیں ، ڈائیلاگ باہمی مفادات کے متنوع شعبوں میں علاقائی اور عالمی چیلنجز سے نمٹنے کے لیے دونوں ممالک کے لیے ایک پلیٹ فارم ہیں ، پاکستان متنوع اندرونی اور بیرونی چیلنجز سے نبرد آزما ہے ، قوم کو شدید سیاسی اور سماجی و اقتصادی بحرانوں کا سامنا ہے، سی پیک منصوبوں کی مالی معاونت کے لیے چین کا غیر متزلزل عزم پاکستان کو اپنے ترقیاتی مقاصد حاصل کرنے کے قابل بناتا ہے۔ چینی میڈیا کے مطابق اسٹریٹجک پارٹنرشپ میں نئی بلندیوں کو حاصل کرنے کے لیے ایک نئی کوشش میں پاکستان اور چین کے وزرائے خارجہ نے 6 مئی کو اسلام آباد میں پاک چین وزرائے خارجہ کے اسٹریٹجک ڈائیلاگ کے چوتھے دور کی مشترکہ صدارت کی۔ یہ بات چیت دونوں ممالک کے درمیان سدا بہار اسٹریٹجک پارٹنرشپ کی تاریخ میں ایک اہم سنگ میل کی نشاندہی کرتی ہے اور خطے کے لیے اہمیت کی حامل ہے۔