کراچی یونیورسٹی خودکش حملے کے ذمہ داروں کو عبرتناک سزا دی جائے گی، وزیر خارجہ بلاول

وزیر خارجہ بلاول بھٹو زرداری نے کہا ہے کہ حکومت اس بات کی ضمانت دیتی ہے کہ کراچی یونیورسٹی خودکش حملے کے ذمہ داروں کو عبرت ناک سزا دی جائے گی جس میں گزشتہ ماہ تین چینی اساتذہ جاں بحق ہوئے تھے۔ دفتر خارجہ میں دہشت گردی کے حملے کے متاثرین کے لیے منعقدہ تعزیتی ریفرنس میں وزیر خارجہ نے دہشت گرد حملے کی مذمت کی۔وزیر خارجہ بلاول نے مزید کہا کہ پاکستان اس وحشیانہ جرم کی مذمت کرتا ہے اور پاک چین سدا بہار اسٹریٹجک اتحاد کے دشمنوں کو کبھی معاف نہیں کرے گا۔ انہوں نے یہ بھی کہا کہ کوئی بھی ہمارے اٹوٹ تعلقات کو ختم نہیں کر سکے گا۔ بلاول نے وعدہ کیا کہ حکام پاکستان میں چینی شہریوں کی سلامتی اور تحفظ کے لیے ہر ممکن کوشش کریں گے۔