وزیراعظم عمران خان کا دورہ چین پاکستان کے لیے ثمرات کا حامل ہوگا۔

میڈیا رپورٹ کے مطابق وزیراعظم عمران خان کی زیرصدارت ایک اعلیٰ سطحی اجلاس منعقد ہوا جس میں آئندہ دورہ چین کے ایجنڈے کو حتمی شکل دی گئی۔ وفاقی وزراء کے ساتھ ساتھ فوج اور انٹیلی جنس کے سربراہان نے اجلاس میں شرکت کی اور اقتصادی اور سٹریٹجک دلچسپی سے متعلق امور پر تبادلہ خیال کیا۔ مزید برآں، شرکاء کو آئندہ دورے کے ایجنڈے کے بارے میں آگاہ کیا گیا جس میں چین کے ساتھ سرمایہ کاری، تجارت، برآمدات اور انفارمیشن ٹیکنالوجی کے شعبوں میں مزید تعاون کو فروغ دینا شامل ہے۔ وزیر اعظم عمران بیجنگ سرمائی اولمپکس کی افتتاحی تقریب میں شرکت کے لیے فروری کے پہلے ہفتے میں چین کا دورہ کریں گے۔ وزیراعظم سائیڈ لائنز پر اعلیٰ چینی قیادت سے ملاقات کریں گے جہاں سی پیک پر پیش رفت اور باہمی دلچسپی کے امور پر تبادلہ خیال کیاجائے گا۔