بیجنگ میں پاکستان کلچر ڈے جوش و خروش سےمنایا گیا۔

بیجنگ میں پاکستان ایمبیسی کالج میں سالانہ بین الاقوامی ثقافتی گالا کا انعقاد کیا گیا جس کا مقصد پاکستان کی بھرپور ثقافت اور ورثے کواجاگر کرنا تھا۔ تقریباً 27 ممالک نے اپنی ثقافتی دستکاریوں کی نمائش کے لیے اپنے قومی اسٹال لگائے۔ اس سال کی تقریب پاکستان کی 75 سالہ آزادی کی تقریبات کا حصہ تھا۔ تقریب کے دوران جمع ہونے والی آمدنی کا ایک حصہ پاکستان کے سیلاب زدگان کے لیے بھی عطیہ کیا جائے گا۔ اس ثقافتی گالا میں سفیروں اور سینئر سفارت کاروں، حکام، میڈیا کے نمائندوں اور طلباء نے شرکت کی۔ چین، ایران، مصر، سوڈان، بلغاریہ، کیوبا، بنگلہ دیش، نیپال، قازقستان، آذربائیجان اور کئی دیگر ممالک نے اپنے ثقافتی دستکاری، مصنوعات اور روایتی کھانوں کی نمائش کی۔ چین میں تعینات پاکستان کے سفیر معین الحق نے تقریب کا دورہ کیا اور گالا کے انعقاد پر سکول انتظامیہ اور طلباء کی کاوشوں کو سراہا۔