وزیر اعظم شہباز شریف سے چینی نائب وزیر سن ہائی یان کی ملاقات،سی پیک کے اگلے مرحلے کی بروقت نفاذ کے عزم کا اعادہ۔

وزیر اعظم شہباز شریف سے نائب وزیر، بین الاقوامی شعبہ مرکزی کمیٹی کمیونسٹ پارٹی آف چائنا (آئی ڈی سی پی سی) سن ہائی یان نے ملاقات کی۔ اس موقع پر شہباز شریف نے چینی صدر کو اس سال پاکستان کا دورہ کرنے کی پھر دعوت دی۔ وزیر اعظم نے ایک چین پالیسی کے لیے پاکستان کے غیر متزلزل عزم کا بھی اعادہ کیا۔ اقتصادی شراکت داری کے حوالے سے وزیر اعظم نے پاکستان کے لیے چین کی فراخدلانہ معاونت، بالخصوص سی پیک کے تحت تعاون کو سراہا اور سی پیک کے اگلے مرحلے کے بروقت نفاذ کی ضرورت پر زور دیا۔ وزیراعظم نے کہا کہ دونوں ممالک سفارتی تعلقات کی 75ویں سالگرہ منارہے ہیں، اس سال کا آغاز پاکستان کے نائب وزیراعظم کے بیجنگ کے کامیاب دورے سے ہوا، پھر وزیر داخلہ نے شنگھائی کا دورہ کیا، اسپیکر قومی اسمبلی کا بھی چین کا دورہ جلد متوقع ہے۔