پشاور-ڈی آئی خان موٹروے منصوبہ آئندہ جے سی سی میں پیش کیا جائے گا۔

مشترکہ رابطہ کمیٹی کے اجلاس سے قبل ایک جائزہ اجلاس کے دوران وزیراعلیٰ خیبرپختونخوا محمود خان کو آگاہ کیا گیا ہے کہ پشاور-ڈی آئی خان موٹروے کو سی پیک منصوبوں کی فہرست میں شامل کیا جائے گا۔ اجلاس میں روڈ سیکٹر میں میگا پراجیکٹس بشمول پشاور ڈی آئی خان موٹروے ، دیر موٹروے اور سوات موٹروے فیز ٹو کی تعمیر پر پیش رفت کا جائزہ لیا گیا۔ اجلاس میں ایڈیشنل چیف سیکریٹری شہاب علی شاہ ، وزیراعلیٰ کے پرنسپل سیکریٹری امجد علی خان ، سیکریٹری مواصلات اور ورکس اعجاز انصاری اور دیگر اعلیٰ حکام نے شرکت کی جنہیں مختلف منصوبوں پر ہونے والی پیش رفت کے بارے میں بریفنگ دی گئی۔ وزیراعلیٰ محمودخان نے کہا کہ یہ منصوبے صوبے کے لیے نہایت اہمیت کے حامل ہیں۔