چائینہ-پاکستان آزاد تجارتی معاہدہ- II پاکستان کے چینی برآمدات میں اضافے کے لئے اہم محرک ثابت ہوگا۔۔۔مشیر وزیراعظم برائے تجارت۔

مشیر وزیراعظم برائے تجارت، صنعت، ٹیکسٹائل و سرمایہ کاری عبد الرزاق داؤد نے کہا ہے کہ چائینہ-پاکستان آزاد تجارتی معاہدہ پاکستان کے چینی برآمدات میں اضافے کے لئے اہم محرک ثابت ہونے کے علاوہ دونوں ملکوں کی دو طرفہ تجارت میں توازن پیدا کرنے میں بھی کلیدی کردار ادا کرے گا۔ ان خیالات کا اظہار انہوں نے وزارت تجارت اور ٹریڈ ڈویلپمنٹ اتھارٹی آف پاکستان کے زیرِ اہتمام ملک بھر میں منعقد کیے جانے والے سیمینارز کے دوسرے مرحلے میں بطورِ مہمان خصوصی خطاب کرتے ہوئے کیا۔ اس موقع پر ایڈیشنل سیکریٹری برائے تجارت نے اپنی تقریر میں کہا کہ چین نے چائینہ-پاکستان آزاد تجارتی معاہدہ-II کے تحت پاکستان کو اپنی منڈی کی تہ تک رسائی فراہم کی ہے۔