چینی سینو ہائیڈرو گروپ سی پیک منصوبہ کے تحت پاکستان میں اعلٰی معیار کے ہائیڈرو پروجیکٹس کی تکمیل کے لئے پُر عزم۔۔۔۔۔

گوادر کی پرو میڈیا رپورٹ کے مطابق چینی سینو ہائیڈرو گروپ کی بے فینگ انویسٹگیشن،ڈیزائن اینڈ ریسرچ کمپنی لمٹیڈ کے ڈپٹی چیف انجینئر یانگ ہییان نے کہا ہے کہ کمپنی سی پیک منصوبہ کے ہائیڈرو پاور پراجیکٹس میں چینی اعلٰی معیار کو برقرار رکھنے کے لئے سرگرم عمل ہے جبکہ سینو ہائیڈرو گروپ کے انجینئرز نے انفراسٹریکچر کے پراجیکٹس پر کام کے دوران اپنی مہارت اور ترغیب کے ذریعے سےایک اچھا تاثر پیش کیا ہے۔چینی کمپنی کے ڈپٹی چیف انجینئر کامزید کہنا تھا کہ چین سے باہر ان کی کمپنی صرف چینی کمپنی کے نام سے معروف ہے لہذا کمپنی کا اہم مقصد ہی یہی ہے کہ وہ تعمیرو ترقی سے متعلق سہولیات کی فراہمی میں بہتر معیار کو ملحوظِ نظر رکھ کر دنیا میں چین کا مثبت پہلواجاگر کرے۔ واضح رہے کہ پاکستان کے صوبہ خیبر پختونخواہ میں سینو ہائیڈرو نے گومل زم ڈیم پراجیکٹ اور دوبر خوار ہائیڈرو پاور جبکہ آزاد جموں کشمیر میں کوہالہ ہائیڈرو پاور کے قیام کو عمل میں لایا ہے۔