سی پیک کے پہلے مرحلے کی کامیابی نے پاکستان اور پورے خطے میں تعمیر و ترقی کی راہ ہموار کی ہے۔

ایمبیسڈر نغمانہ اے ہاشمی کی جانب سے لکھے گئے مضمون میں بیلٹ اینڈ روڈ انیشیٹو (بی آر آئی) کے ایک اہم منصوبے کے طور پر چین پاکستان اقتصادی راہداری (سی پیک) کی اہمیت،علاقائی روابط اور اقتصادی ترقی پر اس کے ممکنہ اثرات پر روشنی ڈالی گئی ہے۔ ان کا کہنا ہے کہ سی پیک کے پہلے مرحلے نے پہلے ہی توانائی اور ٹرانسپورٹ کے شعبوں میں بنیادی ڈھانچے کی مضبوط بنیاد رکھنے میں کامیابی حاصل کی ہے۔ دوسرا مرحلہ سماجی و اقتصادی ترقی اور غربت کے خاتمے پر توجہ مرکوز کرے گا۔ سی پیک کے ذریعے چین اور پاکستان کے درمیان تزویراتی شراکت داری مزید مستحکم ہوئی ہے اور یہ راہداری پورے خطے کے لیے گیم چینجر اہمیت کا حامل  ہے جو گوادر کی بندرگاہ کو ہائی ویز، ریلوے، پائپ لائنز اور فائبر آپٹک کیبلز کے نیٹ ورک کے ذریعے چین کے سنکیانگ خطے سے جوڑتا ہے۔سی پیک کا مقصد خطے کے تقریباً تین ارب لوگوں کی خوشحالی لانا ہے۔ پاکستان کے لیے سی پیک اس کی سماجی و اقتصادی ترقی اور چین، وسطی ایشیا، جنوبی ایشیا اور مشرق وسطیٰ کے درمیان پل کے طور پر اس کے کردار کے لیے اہم ہے۔ اپنے مضمون میں سی پیک کی کامیابی کو یقینی بنانے کے لیے خصوصی اقتصادی زونز کو مناسب طریقے سے تعمیر کرنے اور چیلنجوں پر قابو پانے کی اہمیت پر زور دیا گیا ہے۔ مجموعی طور پر سی پیک اقتصادی ترقی، بہتر سیکورٹی اور علاقائی انضمام کے بے شمار مواقع پیش کرتا ہے۔