سی پیک کے دوسرے مرحلے میں معاشی استحکام کے لیے زرعی اور سبز ترقی پر خاص توجہ مرکوز کی جائےگی: ترجمان،دفتر خارجہ

دفتر خارجہ کی ترجمان ممتاز زہرہ بلوچ نے ہفتہ وار میڈیا بریفنگ کے دوران اس بات پر زور دیا ہےکہ پاکستان اور چین چین پاکستان اقتصادی راہداری (سی پیک) میں تعاون بڑھانے کے لیے پرعزم ہیں۔ انہوں نے سی پیک سے پاکستان کو حاصل ہونے والے خاطر خواہ فوائد پر روشنی ڈالی، جس میں 200,000 سے زائد ملازمتیں پیدا کرنا، نیشنل گرڈ میں 8000 میگاواٹ بجلی کا اضافہ، 510 کلومیٹر ہائی ویز اور 932 کلومیٹر روڈ نیٹ ورک کی تعمیر کے ساتھ ساتھ 820 -کلومیٹر لمبی آپٹیکل فائبر لائن بچھانا ہے۔ ممتاز زہرہ نے سی پیک کے تحت تعاون کو مزید فروغ دینے کے لیے دونوں ممالک کے عزم کا اعادہ کیا اور اسے وسیع تر خطے کے لیے ایک اہم کنیکٹوٹی پروجیکٹ کے طور پر قائم کرنے کے عزم کا اظہار کرتے ہوئے کہا کہ سی پیک کا دوسرا مرحلہ مختلف پہلوؤں پر مشتمل ہے جس میں دیہی احیاء، زرعی ترقی، صنعت کاری، سبز ترقی اور سائنس اور ٹیکنالوجی کے شعبے کی ترقی شامل ہے۔